|
Hoxe ábrese ao público, simultaneamente nas sedes da Fundación Caixa Galicia en Vigo e Pontevedra, a exposición ‘O espello cotián. Colección Caixa Galicia’, unha selección das mellores pezas artísticas adquiridas recentemente pola entidade galega.
Esta escolma, que amosará algunhas obras nunca antes exhibidas, relaciona e vincula unha das temáticas máis referenciais da arte, a figura humana e a súa representación, para o que propón unha serie de temas complementarios que nos relacionan co retrato, a identidade ou o ser humano.
Trátase, segundo informan os organizadores, de achegarse ao cotián presentado no retrato, na figura humana dende diversas perspectivas, obxectivos e linguaxes, na pluralidade de recoñecidos artistas que ofrecen dende a pintura, o debuxo e a escultura posibilidades de analizar o presente do ser humano no seu contexto, no seu territorio.
A escolma feita para esta mostra con dúas sedes quere reflectir tamén a personalidade da Colección Caixa Galicia, unha das pinacotecas máis importantes do Estado que recolle obras que van dende o clasicismo galego ata a arte contemporánea máis actual.
Así, con esta exposición os afeccionados á arte poderán gozar da obra de artistas seminais da historia da plástica moderna galega, coma Arturo Souto, Luís Seoane, Castelao, Díaz Pardo ou Maruja Mallo, e tamén do traballo dos máis novísimos baluartes, coma Rubén Ramos Balsa ou Carlos Rial, entre outros.
Do mesmo xeito, e revelando a ambiciosa estratexia da Colección Caixa Galicia, a mostra exhibirá traballos de artistas capitais da arte española do século XX, como Picasso, María Blanchard (de quen se exhibe, por vez primeira, a obra L'ivrogne), Juan Barjola ou Antonio Saura, e dalgúns outros máis próximos á actualidade, como Jaume Plensa, Darío Villalba ou Juan Muñoz.
Tamén haberá un espazo para artistas estranxeiros que contan cunha importante presenza na Colección Caixa Galicia, como a fotógrafa holandesa Desiree Dolron ou o portugués Juliao Sarmiento. |
