|  | | | | | Acto de clausura do programa 'Pensa en ti'. REMITIDA. | | | |
O presidente da Deputación de Pontevedra, Rafael Louzán, oficiou no Castelo de Soutomaior, xunto cos vicepresidentes provinciais Teresa Pedrosa, Corina Porro e José Manuel Figueroa, o acto de clausura do programa 'Pensa en ti', que promove a institución provincial, ó que acudiron representantes de todas as asociacións de mulleres participantes.
Louzán mostrou a súa satisfacción porque "esta Deputación ten posibilitado nos últimos tres anos que máis de 12.000 mulleres puidesen acceder a estas actividades en pos da súa formación", apuntando, ademais, que na súa aposta pola inserción laboral e social da muller "investimos nos pasados tres anos máis de 700.000 euros, que serviron para financiar case trescentos cursos destinados a 622 asociacións".
Este programa xurdiu co propósito de favorecer o desenvolvemento persoal e o coidado da saúde das mulleres, no ano 2005, como experiencia piloto para as Asociacións de Mulleres do Salnés, facéndose extensivo a toda a provincia ó ano seguinte. "O que comezou cun pequeno catálogo de cursos" —explicou Pedrosa—, "foise ampliando, atendendo coidadosamente as suxestións que recibiamos por parte das Asociacións participantes, ata a acadar a cifra de 103 cursos de diferentes modalidades neste ano 2008. Nestas catro edicións vense rexistrando un notable incremento de participación: Das 43 asociacións que tomaron parte na edición experimental, ás 235 que participaban este ano".
Destes 235 colectivos de mulleres, 33 pertencen ás comarcas do Val Miñor, do Baixo Miño, da Louriña, e do Condado e da Paradanta, que puideron desfrutar dos cursos deste programa nas áreas de arte, manualidades e bricolaxe, cultura tradicional, desenvolvemento persoal e saúde ou igualdade de oportunidades e xestión. 'Pensa en ti' ten por obxecto a concienciación por parte das mulleres do seu papel na sociedade ademais de posibilitar o seu acceso a actividades que permitan o seu desenvolvemento individual e grupal.
|
