|
O presidente da Deputación de Pontevedra, Rafael Louzán, deu a coñecer onte os catro proxectos de modernización e dixitalización de servizos que o organismo provincial presentou ó Plan Avanza do Ministerio de Industria por valor de 18 millóns de euros, e nos que está previsto que invista más de dous millóns e medio de euros.
Un dos proxectos que se desenvolverá entre 2008 e 2011 é o de Modernización Administrativa da Deputación de Pontevedra, que ten por obxecto o deseño e construcción dun sistema de informatización da maior parte dos procedementos administrativos, implementar un novo Portal da Deputación, con nova estrutura e deseño, así como unha serie de servizos telemáticos que permita á cidadanía e ás empresas realizar todos os trámites administrativos de xeito electrónico. Para este proxecto, cóntase cun orzamento de 600.000 euros, dos que a Deputación debería aportar como mínimo o 20 %, isto é, 120.000 euros.
Por outra banda, o projecto de Modernización Administrativa dos Concellos da provincia que pretende deseñar e construír un sistema de informatización da maior parte dos procedementos administrativos dos concellos da provincia, implementar novos Portais dos Concellos, con nova estrutura e deseño, así como unha serie de servizos telemáticos que permita á cidadanía e ás empresas realizar todos os trámites administrativos de xeito electrónico. Ademais da implementación do Sistema de Información Territorial que está a implantar a Deputación nos concellos da provincia dentro do programa PISTA. Este proxecto dispón dun orzamento total de 4.363.525 euros, subvencionables ó 80%, o que supón un investimento por parte da Deputación de 872.905 euros.
Tamén se pretende por en marcha un Centro de Coñecemento para a explotación do arquivo documental e multimedia da Deputación. Especial interese no patrimonio gráfico (fotografía, postal, estampado, gravado, produccións artísticas), audiovisual (vídeo e películas) e sonoro (pizarras, vinilo, bandas magnéticas e cassettes). Tamén o bibliográfico, recollido na biblioteca provincial, editado directamente en gran número pola Deputación. Para este ambicioso proxecto se conta cun orzamento total de 4.262.446 euros, dos que a Deputación tería que investir aproximadamente un 15%, isto é, 639.366 euros.
E por último o WIMAX Pontevedra. Fomento da Sociedade da Información e da Promoción Económica nas zonas rurais da provincia que ten por obxecto achegar a sociedade da información ós sectores da poboación máis desfavorecidos da provincia, favorecer a promoción económica e contribuír á cohesión económica, social e territorial mediante a corrección dos principais desequilibrios existentes. O orzamento para este proxecto é de 8.712.007 euros, dos que a Deputación de Pontevedra terá que aportar, como mínimo, unha achega do 10%, é dicir, 871.200 euros.
Estes proxectos cumpren cos obxectivos da Axenda de Lisboa na busca da converxencia cos países europeos máis avanzados en materia da Sociedade da Información.
|
