|
A Xunta de Goberno da Deputación adxudicou por importe de 176.235,53 euros o proxecto modificado da obra de ensanche e mellora do trazado da estrada provincial Arcade-Amoedo ó seu paso polo municipio de Pazos de Borbén. A mellora desta carretera foi adxudicada inicialmente por 890.000 euros que sumados ós 176.235,53 euros do proxecto modificado o orzamento elévase a máis de un millón de euros.
As obras executadas na estrada provincial Arcade-Amoedo consistiron na dotación dunha plataforma mínima de nove metros de calzada con dous carrís de tres metros e medio cada un e arcéns a ambas marxes de un metro, co obxecto de garantir unha velocidade específica de 60 quilómetros hora.
As obras previstas no proxecto modificado servirán para mellorar a seguridade vial dos peóns. Concretamente, aumentouse o ancho da plataforma un metro, cincuenta centímetros en cada arcén, e neste espazo instalaranse barreiras de protección e a sinalización vertical, permitindo circular ós peóns fora da zona pavimentada e, nas zonas perigosas, estar protexidos pola barreira de seguridade.
Para acometer esta actuación será necesario aumentar o movemento de terras, os muros de contención de terrapléns e a reposición de peches de fincas.
| 
