A Deputación colabora con 30.000 euros nas obras de remate da vivenda comunitaria que Autismo Vigo posúe en Gondomar

A Xunta de Goberno da Deputación aprobou hoxe a sinatura dun convenio de colaboración coa Asociación Autismo Vigo a través do cal o organismo provincial financiará con 30.000 euros a finalización das obras da vivenda comunitaria 'O Salgueiro'.


Esta vivenda comunitaria de Autismo Vigo ofrece servizos de lecer e respiro familiar para todos os integrantes da asociación e, do mesmo xeito, posibilita a estadía permanente, os 365 días do ano, por parte de usuarios maiores de idade que padecen trastornos de espectro autista e que precisan supervisión xeral para o desenvolvemento das tarefas da vida cotiá.


Esta propiedade, que situada na parroquia de Vincios, foille cedida á asociación por parte do Concello de Gondomar o pasado 2007.


Autismo Vigo é unha entidade sen ánimo de lucro fundada o oito de febreiro de 1999 por un grupo de pais preocupados polo futuro das persoas que padecen trastornos autistas. Esta entidade, declarada de Utilidade Pública polo Ministerio do Interior, presta servizos de información e asesoramento á familia; de ocio e tempo libre; de respiro familiar e de canguros especializados, entre outros.