Máis de cen persoas de Arbo, Meis e Pontevedra participan no programa 'Coñece a túa provincia'

Este programa ten por obxecto achegar a Deputación e a provincia á cidadanía, fomentar a convivencia e o asociacionismo entre os distintos colectivos.

A vicepresidenta da Deputación, Teresa Pedrosa, recibiu onte no Pazo da Deputación a un total de 110 integrantes das asociacións San Xosé Obrero, 'Armenteira', de Meis, Centro Diurno Prejubilados e Jubilados Marchosos de Pontevedra e Jubilados e Pensionistas de Arbo que participaron hoxe na sexta xornada das rutas do programa 'Coñece a túa provincia' que promove a Deputación de Pontevedra. Na súa primeira visita, en torno ás 10.30 horas, as asociacións tiveron a oportunidade de coñecer o Pazo Provincial. Seguidamente, visitaron ó padroado de Turismo, ó Museo, ó Pazo de Lourizán, e ó Castelo de Soutomaior.

Este programa ten por obxecto achegar a Deputación e a provincia á cidadanía, fomentar a convivencia e o asociacionismo entre os distintos colectivos e contribuír ó enriquecemento cultural a través da posta en marcha de visitas guiadas ós centros integrantes do patrimonio da Deputación (Museo, Pazo Provincial, Castelo de Soutomaior, Pazo de Lourizán, Mouriscade, á Finca do Areeiro, o Palacete das Mendoza, o Pazo Gandarón e o centro de vacacións de A Lanzada, entre outros).

En total, nesta primeira convocatoria do programa, participarán 5.000 persoas procedentes de 131 asociacións.

O custe de cada viaxe ascende a 25 euros por persoa dos cales 15 son achegados pola Deputación e 10 polos destinatarios. Este prezo inclúe o transporte das persoas en autobús dende os diferentes puntos de saída, dúas guías informativas durante todo o percorrido, a comida (cun menú que inclúe dous pratos, sobremesa, bebidas e café) e o correspondente seguro de viaxe. As visitas son de ida e volta o mesmo día.