|  | | | | | O presidente da Deputación, Rafael Louzán, estivo presente na clausura do Proxecto 'Aquelando'. | | | |
A clausura oficial do Proxecto ‘Aquelando’ da Deputación de Pontevedra tivo lugar o xoves no Castelo de Soutomaior. Este proxecto, que se puxo en marcha o 1 de abril do 2006, remata cun total de 238 persoas beneficiarias nestes dous últimos anos.
‘Aquelando’ creouse co obxectivo de facilitar a inserción profesional de colectivos con especiais dificultades de acceso ó mercado laboral no campo de atención a persoas, facilitar a inserción laboral das persoas desempregadas da provincia de Pontevedra pero, sobre todo, as mulleres e os pertencentes ós colectivos de inmigrantes, emigrantes retornados, minorías étnicas, persoas en risco de exclusión social e desempregados de longa duración.
Do mesmo xeito, o programa tivo en conta as necesidades de integración social e laboral das persoas con discapacidades física, psíquica ou sensorial, persoas sometidas a un maltrato físico ou psíquico e persoas nun proceso de rehabilitación ou reinserción social.
A iniciativa contemplou, entre as súas actividades, a posta en marcha de 12 cursos teórico-prácticos nos que se impartiron áreas formativas no eido da atención as persoas, en concreto na atención a persoas maiores, ocio e tempo libre, infancia e persoas discapacitadas.
O proxecto foi subvencionada polo Fondo Social Europeo no eido da subvención global a través do Ministerio de Administracións Públicas e contou cun orzamento total de 890.808.50 euros, dos cales o FSE asumiu o 70% e a institución provincial o 30 %.
Pese á celebración deste acto de clausura, o traballo realizado pretende ter continuidade, xa que Deputación solicitou de novo a subvención ó Fondo Social Europeo co fin de dar continuidade a accións similares mediante o Proxecto ‘Aquelando 2’ que desenvolverá itinerarios formativos de corte teórico e práctico centrado en temas de atención a persoas: axuda a domicilio, auxiliar de xeriatría, coidador/a de persoas dependentes, tarefas domésticas en centros socio-sanitarios e fogares, mediador intercultural, entre outros. A iniciativa incluirá tamén formación práctica e inserción laboral.
Este plan incluirá módulos formativos para sacar o carné de conducir B para que as persoas que reciban formación en atención a persoas poidan desprazarse a diferentes puntos da provincia para traballar. En caso de ser concedido, o orzamento do proxecto ascenderá de 2,6 millóns de euros dos cales o 80% será achegado polo FSE e o 20% pola Deputación que aportará 523.433, 54 euros.
|
