|
O recinto de IFEVI acolleu este mércores o acto de entrega de diplomas ós alumnos da Escola de Gaitas e Percusión da Deputación en Vigo. O presidente da Deputación, Rafael Louzán, e os vicepresidentes, José Manuel Figueroa e José Juan Durán, foron os encargados de entregarlles os diplomas acreditativos ós 287 alumnos participantes neste escola. En toda a provincia, son 650 o número de alumnos que reciben formación da Escola de Gaitas e Percusión da Deputación.
Dos 287 alumnos, 116 están no grupo de Gaita que imparten os gaiteiros Adrián Rivas, Marcos Campos e Roberto Porto; 40 en clase de redobrante a cargo de Adrián Rodríguez; 45 nas clases de pandeireta de María Baamonde; 68 en Zanfona que imparte Lucía Comesaña Abreu e finalmente, 68 persoas que están integradas na banda de Gaitas e Percusión e que ensaian semanalmente as súas actuacións.
Nestas escolas impártense tanto contido prácticos coma teóricos, é dicir, solfeo e instrumento. Ademais, as clases se complementan con moitas audicións, vídeos didácticos e con outras actividades como demostracións a cargo de construtores de instrumentos antigos, etc. Dentro das modalidades, os grupos están divididos en franxas de idade -menores de 12, entre 12 e 16 e adultos. Tanto as matrículas como as clases son gratuítas e incluso póñense a disposición dos alumnos os instrumentos iniciais. Cada alumno ten 2 horas de clases semanais, distribuídas en dous días.
Os responsables da Deputación recordaron que "o que se clausura este mércores é o cuarto ano que se imparte este proxecto pedagóxico e o nivel dos alumnos permite que moitos deles poidan realizar xa actuacións como ocorreu recentemente no acto de presentación do Plan Cultural en Príncipe Felipe".
|
