|
As Organizacións Sindicais FSIE, UGT, CCOO, USO e CIG denunciaron onte nun comunicado "a pasividade da Consellería de Educación", para "dar solución a unha cuestión suficientemente clarificada por reiterada xurisprudencia". Trátase do "non recoñecemento do dereito elemental que teñen os profesores substitutos de ensinanza concertada a recibir o seu salario nos meses de xullo e agosto".
Os sindicatos non entenden como a Consellería "sigue incumprindo a legalidade", despois de que a conselleira, Laura Sánchez Piñón, prometera en outubro de 2005 "que lle daría unha solución inmediata a este asunto". Polo contrario, a administración autonómica sempre resposta aos sindicatos que a reivindicación "está en estudo".
"Lamentamos que a Consellería de Educación sexa quen propicie que os traballadores afectados se vexan privados dun salario que legalmente lles coresponde e dun tempo cotizado á Seguridade Social que repercutiría favorablemente nunha futura pensión de xubilación", remata o comunicado. | 
