|
A Secretaría Xeral de Política Lingüística vén de convocar subvencións por un importe de un millón de euros para desenvolver proxectos de fomento do uso do galego nos centros públicos de ensino non universitario. Esta cantidade supón un incremento de 200.000 euros respecto da asignada o ano pasado, algo que ten como obxectivo achegar máis recursos e beneficiar máis centros.
Atendendo a petición dos equipos de normalización lingüística dos centros de ensino, adiantou este curso a publicación das convocatorias para que os centros poidan planificar as súas actividades cun orzamento pechado xa na primeira parte do curso.
Para resolver a adxudicación das axudas terase en conta, fundamentalmente, a calidade dos proxectos, que terá un peso do 80 por cento. Tamén se ponderará o número de estudantes de cada centro.
O financiamento máximo para os centros con máis de 50 alumnos será de 2.500 euros, 600 euros para os que conten cun número de alumnos de entre 25 e 50 e 400 euros para os que teñen menos de 25 alumnos. O prazo de presentación de solicitudes remata o vindeiro 6 de outubro. | 
