|
Fomentar a realización de estudos de investigación referidos a Galicia no ámbito das ciencias sociais é o obxectivo do I Premio de Investigación Alexandre Bóveda. Convócao a Cátedra da Universidade de Vigo que leva o nome do galeguista, na que participa a Consellaría de Cultura e Deporte xunto con Caixanova, o Concello de Pontevedra e a Fundación Alexadre Bóveda.
O premio concederase este ano por primeira vez e está dotado con 20.000 euros para a obra gañadora. Pódense presentar ata o 30 de setembro textos en lingua galega de máis de 150 páxinas. Deben ser traballos de investigación de economía, dereito, política ou outras materias de ciencias sociais.
Avaliará os traballos presentados un xurado formado por Ramón Villares, presidente do Consello da Cultura Galega e catedrático de Historia Contemporánea da Universidade de Santiago; Margarita Estévez, catedrática de Análise Matemática da Universidade de Vigo; Argimiro Rojo, catedrático de Ciencia Política e da Administración da Universidade de Vigo; Xavier Labandeira, profesor de Economía Aplicada da Universidade de Vigo, e Marta García, profesora de Dereito Administrativo da Universidade da Coruña. | 
