|
A Consellería de Cultura e a Universidade de Santiago continuarán no 2008 e no 2009 co proxecto de análises do xacemento arqueolóxico do Areal, en Vigo. O Consello da Xunta aprobará mañá un convenio polo que o departamento que dirixe Ánxela Bugallo achegará nestes dous anos un total de 38.000 euros para realizar estes traballos e dar a coñecer este xacemento romano con estruturas vinculadas ao medio mariño, como a industria de salazón e as saíñas da época tomana.
O obxectivo deste proxecto é continuar os estudos e análises precisos para coñecer as características paleoambientais e arqueométricas do rexistro arqueolóxico. Así, realizaranse análises xeoarqueolóxicas, sedimentolóxicas e xeomorfolóxicas.
Os achados atópanse no solar do patio do antigo convento de monxas do Areal, que máis tarde foi hospital militar. O terreo foi escavado no derradeiro trimestre de 1995 e inicio de 1996. O solar, incluído na área de protección do xacemento romano de Areal-Pontevedra, atopábase a menos de 50 metros do lugar no que en 1953 apareceron varias estelas funerarias romanas, hoxe no museo municipal.
Os niveis arqueolóxicos corresponderon a unha ampla banda temporal, dende o século XIX ata a época altoimperial romana. Baixo o nivel do XIX atopouse un do XVII, outro medieval, unha necrópole que vai dende o século II ata o VI ou VII despois de Cristo, unhas saíñas en toda a extensión do terreo, datables no século II d.C. e, no derradeiro nivel, restos de ánfora de época altoimperial.
A necrópole de época tardorromana foi a máis representada, e atopáronse enterramentos en tégula, granito, pizarra, ánfora, terra... É de salientar a aparición de restos importantes de elementos relacionados con enterramentos.
Deste xeito, confirmouse a existencia dun poboamento relativamente importante (vicus), situado no que hoxe é o centro de Vigo. Os estudos aos que se lles dá agora continuidade pretenden afondar neste coñecemento. | 
