|
O director xeral de Promoción e Difusión Cultural da Xunta, Luis Bará, confirmou hoxe no Parlamento que a Xunta de Galicia non participa, nin ten previsto facelo, no financiamento dos actos organizados polo concello de Tui para honrar a figura do polígrafo tudense Xosé María Álvarez Blázquez, homenaxeado este ano.
Segundo un comunicado do PPdeG, a confirmación chegou en resposta a unha pregunta formulada polo deputado popular César Pérez Ares, esta mañá, na Comisión de Educación e Cultura do Parlamento, na que este instou ao director xeral a mudar de actitude para que a Xunta apoie as diferentes iniciativas promovidas polo Concello de Tui co obxectivo de recuperar e poñer en valor a figura protagonista do Día das Letras galegas de 2008.
Ao responder ao PPdeG, o director xeral de Difusión e Promoción Cultural botou "balóns fóra", argumentando que a organización dos actos conmemorativos do Día das Letras Galegas corresponde á Real Academia Galega, que este ano decidiu celebralos na cidade de Vigo. |
