|  | | | | | Dolores Villarino recibiu unha medalla de bronce coa silueta de Laxeiro. SONIA DAPONTE/AGN | | | |
A presidenta do Parlamento de Galicia, Dolores Villarino Santiago, e o secretario xeral da Fundación Laxeiro, Carlos García-Suárez Otero, asinaron hoxe un convenio de colaboración para levar á Cámara autonómica a exposición 'De Vigo a Bos Aires – Laxeiro e a pintura galega de posguerra' entre os meses de setembro e decembro do presente ano. A presidenta da Cámara sinalou que esta exposición forma parte da celebración do centenario do nacemento do intelectual e artista Xosé Otero Abeledo "Laxeiro", natural de Lalín e afincado en Vigo.
En rolda de prensa, Villarino explicou que a entrada principal do Parlamento, na compostelá rúa do Hórreo, "está presidida por unas magníficas vidrieiras de Laxeiro" e engadiu que "resultaba obrigado que quen preside o edificio no que está depositada a vontade dos galegos e galegas" lograse unha "contribución" da Cámara galega.
Villarino dixo que esta mostra une 40 obras dos artistas coetáneos a Laxeiro, que convivirán coas duascentas obras de pintores e escultores galegos do século XX que posúe a Cámara, que constituirá un "feito cultural de primeira orde". Salientou que os visitantes á mostra poderán contemplar por exemplo a vidreira elaborada por Laxeiro para a Cámara autonómica en 1989, situada no lucernario da entrada principal, e que dende este ano convive coa elaborada por Isaac Díaz Pardo para o Salón de Plenos.
A mostra que presentará a Fundación Laxeiro na Cámara autonómica presenta obras de Laxeiro, Maside, Lugrís, Mario Granell, Colmeiro, Isaac Díaz Pardo, Julia Minguillón, Manuel Torres e Luis Seoane. As obras están organizadas en torno aos grupos "A paisaxe e a cidade", "O pulo industrial e comercial", "O retrato burgués", "Mundo intelectual", "Continuidade e renovación" e "Artistas galegos en Buenos Aires".
A exposición convivirá cos fondos propios da Cámara, que posúe obras do propio Laxeiro, Maside, Colmeiro, Quessada, Urbano Lugrís, Luis Seoane, Alfonso Sucasas, Barreiro, Menchu Lamas e escultores como Buciños ou Acisclo, entre outros. Esta iniciativa pon de manifesto o compromiso da Cámara autonómica coa arte galega, e que completa as obras en poder da institución coa realización de exposicións temporais, como foron os dous ciclos de "Diálogo dende o invisible", nos que foron presentadas 50 obras de 15 xóvenes artistas galegos de pintura, fotografía e audiovisuais.
Pola súa banda, o alcalde de Vigo e presidente da Fundación, Abel Caballero, quen cualificou a iniciativa de "feito cultural extraordinario" e engadiu que a iniciativa ofrece "unha nova dimensión ao Parlamento de Galicia, que está a adoptar unha relevancia externa descoñecida". Tamén salientou o "magnífico modelo de funcionamento" da Fundación Laxeiro con relación aos actos de conmemoración do centenario do artista.
O secretario xeral da Fundación, Carlos García-Suárez Otero, reivindicou o papel de Vigo como centro impulsor da cultura e explicou que a iniciativa desta exposición forma parte do traballo da Fundación para "manter a obra de Laxeiro viva, para que siga sendo nexo de unión entre todos nós".
A este acto tamén asistiron o concelleiro de Cultura de Vigo, Jesús López Carreira, e a vicepresidenta da Fundación, Mª Cruz Otero Villamarín, quen entregou á presidenta da Cámara unha medalla de bronce coa silueta do artista de Lalín afincado en Vigo. |
