|
O Museo do Mar de Galicia, situado na parroquia viguesa de Alcabre, inicia o martes os obradoiros de verán, dirixidos a nenos entre 5 e 12 anos. A intención desta iniciativa e promover o coñecemento do mar, da súa fauna, das embarcacións e da pesca, sempre en clave de diversión.
Os obradoiros están organizados en temáticas variadas coma 'Gozando da praia', 'Coñecendo o Mar' ou 'Eu son mariñeiro' e terán unha duración de catro días, utilizando para as súas ensinanzas tanto a exposición permanente do museo coma as praias colindantes ou os patios exteriores.
'Gozando da praia', dirixido a nenos entre 5 e 7 anos, afondará no descrición dos animais, nas manualidades a pé de praia –coma facer un móbil, por exemplo, con cunchas-, a observación dos peixes no acuario ou, por exemplo, a procura dun tesouro entre a praia e o museo. 'Coñecendo o mar' vai dirixido a rapaces entre 8 e 12 anos e inclúe dende observacións con prismáticos ata con tubo e gafas no mar, ademais de saídas en embarcacións tradicionais, en colaboración coa Asociación de Embarcacións Tradicionais de Bouzas, para aprender a navegar. 'Eu son mariñero' tamén está pensado para rapaces nesa franxa de 8 a 12 anos, e nel os rapaces aprenderán cómo funciona e cómo se constrúe unha batea, cos seus flotadores, cabos e mortos de chumbo ou pedra. Haberá tamén un apartado no que os rapaces aprenderán o deseño de velas e barcos, no que os mariñeiros ensinarán a preparar distintos aparellos de pesca.
Os obradoiros terán lugar as dúas últimas semanas de xullo e todo o mes de agosto, en horario de 10.30 horas a 13.10 cunha parada para a merenda. Os pais deberán inscribir aos nenos previamente chamando ao Museo aos números 986247691 ou 986 247750. |
