Medio Ambiente emite o documento de referencia para o parque empresarial de Ponteareas

A Dirección Xeral de Desenvolvemento Sostíbel da Xunta de Galiza emitíu o pasado luns o chamado documento de referencia co que se pon en marcha o proceso de avaliación estratéxica ambiental, un trámite obrigatorio na tramitación dun parque empresarial, como o de Ponteareas, e que agora terá a súa continuidade coa elaboración por parte da Consellaría de Vivenda e Solo do Informe de Sustentabilidade Ambiental.

A través dun comunicado de prensa, o dirixente nacionalista Roberto Mera manifestou que "nos vindeiros meses concluirase o proceso de avaliación ambiental que dará paso á aprobación no Consello da Xunta do proxecto sectorial e á licitación da adquisición dos terreos nos que se vai ubicar o parque empresarial".