|
O Concello de Ponteareas executará as obras de mellora no Mercado Municipal e o remate da humanización da Praza Maior, rúa Esperanza e Praza Arxentina por un importe de 108.300 euros. A Xunta de Goberno do pasado 30 de xuño deu o seu visto bo a unha subvención concedida pola Consellería de Innovación e Industria da Xunta de Galicia para o financiamento de parte dos traballos.
Segundo un comunicado do goberno municipal, do total do custo das obras, o Concello aportará 32.490 euros -17.934 para a humanización e 14.556 para o mercado-, que representan o 30 por centro do investimento total, e a administración autonómica 75.811 euros – deles, 33.965 para o mercado e 41.846 para a humanización-.
O Concello executará deste xeito unha nova fase da mellora do mercado municipal, e continúa coa humanización do casco urbano, co remate do contorno da Praza Maior.
Rematan as obras na parroquia de Padróns
Por outra parte, a concellería de Vías e Obras do Concello de Ponteareas, que dirixe Alberto Novoa, rematou as obras de varias pistas no barrio de Cortellas, na parroquia de Padróns.
Os traballos centráronse no asfaltado, limpeza e preparación do terreo das pistas. Estas obras, executadas con maquinaria e persoal do Concello de Ponteareas, forman parte do plan que está a desenvolver a Concellería de Vías e Obras do Concello ponteareán para este ano 2008 e que perseguen a mellora de todas as pistas e estradas que integran as distintas parroquias. | 
